Gujarati Samaj of NSW

Current News

 

રાજકોટમાં સ્વિમિંગ પુલથી લઇ સ્ટેડિયમમાં યોગ, એક્વા યોગામાં સ્થપાશે વિશ્વ વિક્રમ
Posted on Wednesday June 21, 2017

ત્રીજા આંતરરાષ્ટ્રીય યોગદિન નિમિત્તે રંગીલું રાજકોટ યોગમય બની ગયું હતું. શહેરમાં ઠેર-ઠેર સામૂહિક યોગના કાર્યક્રમોનું આયોજન કરાયું હતું. રાજકોટ મનપા દ્વારા અલગ-અલગ વોર્ડ માટે કુલ પાંચ સ્થળોએ કાર્યક્રમનું આયોજન કરાયું હતું. ઉપરાંત સૌરાષ્ટ્ર યુનિવર્સિટી સહિત શહેરની તમામ શાળા-કોલેજોમાં વહેલી સવારથી યોગના કાર્યક્રમો થયા હતા. રાજકોટના સ્નાનાગરોમાં 792 મહિલાઓએ પાણીમાં યોગાસનના પ્રયોગો કર્યા હતા અને વિશ્વ વિક્રમ તરીકે નોંધ લેવાઇ છે.

ખાસ મહિલાઓ માટે પાણીમાં થતા એક્વા યોગનું આયોજન કરાયું હતું. જેમાં 7 વર્ષની બાળકીથી માંડી 82 વર્ષના મહિલાએ પાણીમાં યોગ કર્યા હતા. મનપાનો પ્રયાસ ગિનિસ બુક ઓફ વર્લ્ડ રેકોર્ડ કરવાનો છે. મનપાના તમામ સ્વિમિંગ પુલ પર તેનું આયોજન થયું હતું. એક્વા યોગનું વીડિયો રેકોર્ડિંગ કરવામાં આવ્યું છે તેને ગિનિસ બુકમાં મોકલાશે. મનપા સંચાલિત મહર્ષિ દયાનંદ સરસ્વતી સ્વિમિંગ પૂલ (કાલાવડ રોડ), લોકમાન્ય તિલક સ્નાનાગાર (રેસકોર્સ), સરદાર વલ્લભભાઇ પટેલ સ્નાનાગાર(કોઠારિયા રોડ) અને સ્વામી વિવેકાનંદ સ્નાનાગાર(પેડક રોડ) પર ખાસ મહિલાઓ માટે સામૂહિક એક્વા યોગ થયા હતા.

રાજકોટ મનપા દ્વારા રેસકોર્સના ક્રિકેટ સ્ટેડિયમમાં વોર્ડ નં. 2, 3 અને 7ના નગરજનો માટે કાર્યક્રમનું આયોજન કરાયું હતું. જેમાં મોટી સંખ્યાં નગરજનો જોડાયા હતા. ચો તરફ સૌ કોઈ યોગ કરીને વિશ્વ યોગ દિનને સાર્થક કર્યો હતો. જ્યાં ક્રિકેટ મેચની રમત રમાતી હતી ત્યાં આજે યોગ કરતાં લોકો જોવા મળ્યા હતા. શહેરની તમામ શાળા અને કોલેજો સામુહિક યોગના કાર્યક્રમોમાં જોડાઈ હતી. શાળા-કોલેજના વિદ્યાર્થીઓને વહેલી સવારે યોગાભ્યાસ કરાવવામાં આવ્યો હતો.



સૌરાષ્ટ્રના આયાત-નિકાસકારોને GST મામલે DGFT કરશે સહાય
Posted on Wednesday June 21, 2017

  • આયાત-નિકાસકારોને શું ફાયદો, યોજનાઓ વિષે માહિતી માટે સેલ કાર્યરત
    રાજકોટ : ગુડસ એન્ડ સર્વિસટેક્ષ (જીએસટી) માં આયાત-નિકાસકારોને શું ફાયદો, યોજનાઓ વિશે જાણકારી માટે મીનીસ્ટ્રી ઓફ કોમર્સ દ્વારા ખાસ સેલ ડીજીએફટી (ડાયરેકટર જનરલ ફોરેન ટ્રેડ) કચેરીમાં કાર્યરત કરવામાં આવેલ છે. આથી કોઈ પણ આયાત-નિકાસકાર આ સેલનો સંપર્ક કરી તેમને પડતી મુશ્કેલીઓ વિષે વિશેષ માર્ગદર્શન મેળવી શકે છે. આ માટે રાજકોટ ડીજીએફટીમાં સેલ કાર્યરત કરી દેવામાં આવેલ છે
    તા.૧લી જુલાઈથી કેન્દ્ર સરકાર દ્વારા જીએસટીનો અમલ કરાવવા માટે તનતોડ મહેનત કરવામાં આવી રહી છે. એક એવી ચર્ચા ચાલી રહી છે કે સંભવિત ૧લી જુલાઈના બદલે સપ્ટેમ્બર માસમાં જીએસટી અમલી બનાવવામાં આવશે પણ તે માત્ર વાતો જ છે અને ૧લી જુલાઈથી જ જીએસટીનો અમલ શરૃ કરવામાં આવનાર છે. રાજકોટ ઉપરાંત સૌરાષ્ટ્રમાંથી અનેક એગ્રો તેમજ મશીનરી, ઓટોપાર્ટસ, ઓટોમોબાઈલ, સબમર્સીબલ સહિતની આઈટમોની ધુમ નિકાસ વિદેશોમાં કરવામાં આવી રહી છે. આથી હજું સુધી જીએસટીના કારણે આયાત-નિકાસકારાને શું કાર્યવાહી કરવાની રહે છે અથવા મરચન્ટ એક્ષપોર્ટરોને જીએસટીમાં કંઈ રીતે માઈગ્રેશન કરવાનું રહે છે તથા નિકાસ પ્રોત્સાહન માટે આપવામાં આવતી યોજનાઓનો ફાયદો લેવા માટે શું કાર્યવાહી કરવાની રહે છે તે અંગેની માહિતી માટે રાજકોટમાં ડીજીએફટીની કચેરીમાં ડે.ડાયરેકટર સુવિધ શાહની અધ્યક્ષતામાં ખાસ સેલ કાર્યરત કરવામાં આવેલ છે. માત્ર રાજકોટ જ નહીં બલ્કે સમગ્ર સૌરાષ્ટ્રના આયાત-નિકાસકારો ડીજીએફટી કચેરીનો સંપર્ક કરી માહિતી મેળવી શકશે તેમ જાણવા મળેલ છે. આ પ્રકારની વ્યવસ્થા મીનીસ્ટ્રી ઓફ કોમર્સ દ્વારા કરવામાં આવેલ છે.



રાજ્યના ઉદ્યોગોના GSTને લગતા પ્રશ્નો માટે ૧૩ જો. કમિ.ની નિમણૂંક
Posted on Wednesday June 21, 2017

  • સગવડ સાથે અગવડ પણ વધવા ભીતિ
    રાજકોટ : ૧લી જૂલાઈથી દેશભરમાં જીએસટીનો અમલ થવા જઈ રહ્યો છે. જીએસટીનું કર ભારણ, કાયદાની અમલવારીની સમજ અને તેમાં રહેલી અનેકવિધ વિસંગતતાઓને લઈને વેપારી-ઉદ્યોગપતિઓ મુંઝવણમાં છે. ત્યારે રાજ્યભરના વિવિધ ઉદ્યોગોને જીએસટીને લગતા પ્રશ્નોની રજૂઆત અને સમજ માટે વેટ વિભાગના ૧૯ જોઈન્ટ કમિશનરની નિમણૂંક કરવામાં આવે છે.
    જીએસટીના ટેક્સ સ્લેબ તેમજ તેના અમલીકરણ માટે વિવિધ ઉદ્યોગોની આંતરિક સ્થિતિ અલગ અલગ હોય છે. માટે તેમના પ્રશ્નો અને સમસ્યાઓ પણ અલગ હોવાના.
    જેની સામે રાજ્યના જિલ્લાઓમાં એક-બે જ જોઈન્ટ કમિશનર હોય છે. વિવિધ ઉદ્યોગો તેમને વારંવારની ઝીણવટ ભરી પૂછપરછ કરતા રહે તો ગૂંચવડો અને અસંતોષ ફેલાય તેવી શક્યતા રહે છે.
    જેને ધ્યાને રાખીને જીએસટી સંદર્ભના કામગીરીની વહેચણી કરી વહીવટ સરળ બનાવવા વેટ કચેરી તરફથી નિર્ણય લેવાયો છે. જેને અનુલક્ષીને રાજ્યભરમાં ૧૩ જોઈન્ટ કમિશનરની ચોક્કસ ઉદ્યોગોને લગતી સમસ્યાના નિરાકરણ માટે નિમણ્ુંક કરવામાં આવી છે. જો કે આ વ્યવસ્થાથી સગવડ સાથે અગવડ પણ વધવા ભીતિ છે.
    દા.ત. સૌરાષ્ટ્રમાં મોટાપાયે આવેલા કોઈ ઉદ્યોગને લગતા પ્રશ્નોની રજૂઆત માટે નિયુક્ત થયેલા જોઈન્ટ કમિશનર સુરત, વડોદરા કે એવા કોઈ જિલ્લામાં હોય તો અહીંના ઉદ્યોગકારને ત્યાં ધક્કા ખાવા પડશે. અથવા ટેલીફોન કે અન્ય માધ્યમથી સતત સંપર્કમાં રહેવું પડશે. એવું દરેક ઉદ્યોગ સાથે થઈ શકે છે.



એમ.જી. હોસ્ટેલ માથાકુટમાં5યુવાનોની ખોટી સંડોવણી
Posted on Wednesday June 21, 2017

  • ફરિયાદીઓ જ હથિયારો સાથે આવેલા, આવેદન આપી રજૂઆતો
    રાજકોટ : એમ.જી. હોસ્ટેલ માથાકુટ પ્રકરણમાં પાંચ યુવાનોની ખોટી સંડોવણી થયાનું જણાવી તટસ્થ તપાસની માંગ કરતુ ંઆવેદન આપવામાં આવ્યું હતું. આ આવેદનમાં જણાવાયું હતું કે, ખરેખર તો ફરિયાદી જ હથિયારો સાથે આવ્યા હતા.
    આવેદનમાં એમ પણ જણાવાયું હતું કે, એમ.જી. હોસ્ટેલ આસપાસની લારીવાળાના આધારે ખોટી ફરિયાદો નોંધવામાં આવી છે. કરણી સેનાએ જે આક્ષેપ લગાવ્યો છે કે, આ હોસ્ટેલના વિદ્યાર્થીઓ કોઈને પૈસા આપતા નથી મફત નાસ્તાઓ કરી જાય છે તે પાયા વગરનો છે. પોલીસે કોઈ દબાણમાં આવીને કાર્યવાહી કરી હોવાનું જણાય છે. યોગ્ય તપાસ કરી સત્ય હકિકતો બહાર લાવવા માટે દલિત સમાજ તરફથી માંગ છે અને જો આમ કરવામાં નહિ આવે તો ઉપવાસ આંદોલન કરવામાં આવશે અને આમ છતાં પણ મામલો નહિ ઉકેલાય તો લડત પણ છેડવામાં આવશે.



આર.ટી.ઈ.માં બાકી રહેલા બાળકોને પણ સમાવી લો
Posted on Wednesday June 21, 2017

  • દરેક શાળા પુરતા છાત્રોને સમાવી લેતો પ્રશ્ન હલ થઈ જાય
    રાજકોટ : રાઈટ ટુ એજ્યુકેશનમાં હજૂ ૫૦૦થી વધારે બાળકો પ્રવેશ વંચિત રહી ગયા છે જો દરેક શાળા પુરતા ૨૫ ટકા છાત્રોને સમાવી લે તો બધા બાળકોને પ્રવેશ મળી શકે તેમ છે. આજે ડી.ઈ.ઓ. કચેરી સુધી આ વિગતો વાલીઓને સાથે રાખીને પહોંચાડવામાં આવી હતી. તાજેતરમાં સરકારે બાકી રહેલા બી.પી.એલ. બાળકોને ખાલી જગ્યા હોય ત્યાં સમાવવા માટે પ્રયાસો કર્યા હતા. નવા પ્રવેશોની ફાળવણી થઈ રહી છે ત્યારે હવે ૫૦૦ આસપાસ બાળક જ પ્રવેશ વંચિત રહી જાય તેમ છે. આ તમામને સમાવી લેવા માટે શાળાઓને તેમની વર્ગ સંખ્યા પ્રમાણે ૨૫ ટકા બાળકોને સમાવી લેવા માટે તાકિદ કરવી રહી. એડમીશનના બાકી રહી ગયેલા બાળકો અંગે વાલીઓએ આજે શાસનાધિકારીઓ સમક્ષ પણ રજૂઆતો કરી હોવાની વિગતો સાંપડે છે. ડી.ઈ.ઓ, કચેરી, કલેકટર કચેરી તેમજ શાસનાધિકારી કચેરી વચ્ચે વાલીઓ દોડતા રહે છે પણ બાકી રહી ગયેલા બાળકો અંગે કોઈ નિવેડો નથી આવતો.



ગોંડલ યાર્ડમાં વેપારીએ અનેક ખેડૂતોને લાખોમાં ખંખેરી નાખ્યા
Posted on Wednesday June 21, 2017

  • સી.પી.કચેરીએ ખેડૂતો ધસી આવ્યા, આત્મવિલોપનની ચીમકી નાણાં અપાવવા રજુઆત
    રાજકોટ : ગોંડલ હાઈ- વે પર બીલીયાળા નજીક ઈશ્વર જીનીંગ મીલ તેમજ ગોંડલ યાર્ડમાં પેઢી ધરાવતાં રમેશભાઈ જાદવભાઈ ગમઢા નામના ઈસમે ગોંડલ તથા રાજકોટ પંથકના અનેક ખેડૂતો પાસેથી લાખો રૃપીયાની ખેત પેદાશ, જણસો ખરીદ કરીને સામે નાણાંના બદલે ચેક આપી કરોડો રૃપીયાનું કારસ્તાન આચર્યાના આક્ષેપો સાથે છેતરાયેલા ખેડૂતોનો સમુહદાય સી.પી.કચેરીએ ધસી આવ્યો હતો અને પરસેવાની મહેનતની કમાણીના નાણાં કઢાવી આપવા કાકલુદી કરી હતી. જો નાણા નહી મળે તો નાછૂટકે ખેડૂતોએ આત્મવિલોપન કરવાની ફરજ પડશે તેવી ચીમકી ઉચ્ચારી હતી.
    ગોંડલ તાલુકાના લોધીકા, ચાંપાબેડા, થોરડી, અભેપર, ચીભડા, માખાવડ, પાળ, માખાકરોડ, ડાંગરવાડા સહિતના ગામોના ખેડૂતો પાસેથી રમેશ જાદવભાઈ ગમઢાએ સાથીદારો ભરત તથા નાગજી સાથે મળી કપાસ, મગફળી કે આવી કરોડો રૃપીયાની ખેતપેદાશો ખરીદ કરી હતી. દશ હજારથી વધુની રોકડના વ્યવહાર પર સરકારની ના હોવાના ઓઠા તળે રમેશે જણસો ખરીદ કરી ખેડૂતોને લાખો રૃપીયાના ચોક્કસ મુદત્તના બેંક ચેક આપ્યા હતા. જે ચેક ખેડૂતોએ બેંકોમાં જમા કરાવતાં બેલેન્સના અભાવે બાઉન્સ થયા હતા. પ્રારંભે તો બે, પાંચ ખેડૂતો હશે તેવું ચાલ્યું. ધીમે ધીમે રમેશની યાર્ડ સ્થિત પેઢી તથા જીનીંગ મીલે રમેશને શોધવા ખેડૂતો ચક્કરો કાપવા લાગતાં ખેેડૂતોને ખ્યાલ પડયો કે રમેશે વિશ્વાસધાત આચર્યો.
    કરોડો રૃપીયાનું ખેડૂતોનું ફુલેકું ફેરવીને ભુગર્ભમાં ઉતરી ગયેલો રમેશ ખેડૂતોને શોધ્યો મળતો ન હોવાથી તેના સાથીદારો પાસે ખેડૂતોએ પોતાની જીવાદોરી સમાન નાણાંની ઉઘરાણી કરતાં તેઓ તરફથી પણ કોઈ જવાબો મળ્યા નહી. રમેશના ઘરે જાય તો તેના પરિવારજનો કહે તબીયત સારી ન હોવાથી હોસ્પિટલમાં લે નાણાંની ઉઘરાણી કરતાં નહીં નહીં તો બધા ઉપર ન જોયા જેવી થશે આવી ધમકીઓ આપી ખેડૂતોને હાંકી કઢાતાં હતા. અનેક ખેડુતોને બેથી પચ્ચીસ લાખ સુધીની ખેતપેદાશો ખરીદ કરીને કરોડો રૃપીયાની છેતરપીંડી કરનાર રમેશ પાસેથી નાણાં કઢાવી આપવા રજુઆત કરાઈ હતી. જો કે છેતરપીંડીની ઘટના રાજકોટ ગ્રામ્ય પોલીસમાં હદમાં બની હોવાથી મદાર રાજકોટ રૃરલ પોલીસ પર રહેશે. અત્રે ઉલ્લેખનીય છે કે ખેડૂતો સાથે કરોડોની કળાનો આક્ષેપ છે એ રમેશેએ રાજકોટ જિલ્લા ભાજપ પ્રમુખ ડી.કે.સખિયા પાસેથી ૨૭ કરોડ સહિતના એકાદ ડઝનથી વધુ પાસેથી વ્યાજે નાણાં લીધા હોય ધાકધમકી આપતાં હોવાથી ઝેરી દવા પી આત્મહત્યાનો પ્રયાસ કર્યાની ઘટના અને સ્યુસાઈડ નોટ ચર્ચાની એરણે ચડી હતી.



શહેર આજે યોગમય, પાંચ સ્થળે હજારો લોકો કરશે સામૂહિક યોગ
Posted on Wednesday June 21, 2017

  • શાળા, કોલેજોના છાત્રો, સ્ટાફ, વિવિધ સંસ્થાઓથી લઈને સામાન્ય જન જોડાશે
    રાજકોટ : વિશ્વ યોગ દિવસની ઉજવણી માટે રાજકોટ શહેરમાં પણ યોગાસનને લઈને છેલ્લા પખવાડીયાથી અનેરો ઉત્સાહ દેખાયો હતો. આવતીકાલે સવારે શહેરમાં પાંચ સ્થળોએ હજારો લોકો સામુહિક યોગ કરશે. જ્યારે દેશભરમાં પ્રથમ વખત રાજકોટમાં ૭૯૨ સ્ત્રીઓ સ્નાનાગારોમાં સામુહિક એક્વા યોગ, પાણીમાં પોણો કલાક સુધી યોગાસન કરશે.
    મનપાના સુત્રોમાંથી મળેલી વિગતો મુજબ શહેરમાં ત્રણેય ઝોનમાં સામુહિક યોગ માટે અલગ અલગ વ્યવસ્થા થયેલી છે જેમાં સેન્ટ્રલ ઝોનમાં રેસકોર્સના માધવરાવ સિંધીયા ક્રિકેટ ગ્રાઉન્ડ, ઉપરાંત ઈસ્ટમાં કુવાડવા રોડ આશ્રામ સામેનું ગ્રાઉન્ડ, પારડી રોડ પરનું મેદાન અને વેસ્ટ ઝોનમાં બે સ્થળે નાનામવા સર્કલ સ્થિત અને સાધુવાસવાણી રોડ પર સવાર સાત કલાકે ૪૫ મિનિટના સમુહ યોગ થશે. મનપાના કાલાવાડ રોડ, રેસકોર્સ, કોઠારીયા રોડ અને પેડક રોડ પરના ચાર સ્નાનાગારોમાં આઠ વર્ષથી ૮૫ વર્ષ સુધીની મહિલાઓ પાણીમાં સાડા આઠ વાગ્યાથી પોણો કલાક સુધી યોગાસનો કરશે.
    પાંચ સ્થળે થનારા સામુહિક યોગમાં શાળા, કોલેજોના છાત્રો, સ્ટાફ, વિવિધ સામાજીક સંસ્થાઓ, ટ્રસ્ટ, ધાર્મિક સંસ્થાઓ, એનજીઓ, સરકારી કર્મચારીઓ, શહેરીજનો મળી અંદાજે અર્ધો લાખથી વધુ લોકો સામુહિક યોગાસન કરશેનો મનપાએ અંદાજ બાંધ્યો છે. સૌરાષ્ટ્ર યુનવિર્સિટી ખાતે ૧૨૦૦ મુક બધિરો સાઈન લેંગ્વેજથી રાષ્ટ્રગીતનું ગાન કરશે.
    ઓમ ઉચ્ચારણથી આરંભ વિવિધ આસનો કરાવાશે
    સામુહિક યોગમાં ઓમ ઉચ્ચારણથી હળવી શારીરિક કસરત ત્યારબાદ આસનો કરાવાશે. જેમાં વૃક્ષાસન, શશાંકાસન, મકરાસન, ભુજંગાસન, તાડાસન, ભદ્રાસન, પાદહસ્તાસન, અર્ધચક્રાસન, ત્રિકોણાસન, વજ્રાસન, ઉત્તાનમંડુકાસન, પવનમુક્તાસાન, શવાસનની ક્રિયાઓ કરાવાશે ત્યારબાદ ભ્રામરી પ્રાણાયામ, અને ધ્યાન યોગ નિષ્ણાંતો દ્વારા કરાવાશે.



પરીક્ષાઓમાં ગેરરીતિનું દુષણ વધારે, કુલપતિ દરકાર લો
Posted on Wednesday June 21, 2017

લો ફેકલ્ટીની આડમાં વચેટીયાઓની કોેલેજો નથી ભરવીને ?
રાજકોટ : સૌરાષ્ટ્ યુનિવર્સિટીના વહિવટ અને પરીક્ષામાં ચાલતી ગેરરીતિ અંગે યુવક કોંગ્રેસના રાજદિપસિંહ જાડેજાએ સવાલો ઉઠાવીને કુલપતિ દરકાર કરે તેવી રજૂઆતો ઉઠાવી હતી.
કુલપતિને તેમણે સવાલ કરતા જણાવ્યું હતું કે, યુનિવર્સિટીનો વહિવટ કથળ્યો છે અને ક્યાં પરીક્ષા ચોરી ચાલે છે તેની સૌને ખબર છે. કુલપતિ દ્વારા મોકલવામાં આવેલી ચેકિંગ ટુકડીઓ પણ તેના રિપોર્ટ કરે છે જેની દરકાર કરવામાં આવી નથી. ખરેખર તો દરેક પરીક્ષામાં સમિક્ષાઓ થવી જરૃરી છે.
બાકી કુલપતિ જે કોઈ મંજૂરીઓની વાતો કરે છે તેવી કોઈ મંજૂરી અમે માગેલી નથી. પરીક્ષા ચોરીના દુષણને ખાળો. બાકી લો ફેકલ્ટીની આડમાં કોઈ વચેટીયાઓની કોલેજો ન ભરાઈ જાય તે જોવાનું રહેશે. વહિવટમાં સુધારા કરવા પ્રમાણિક પ્રયાસો કરો તેવી માંગ છે.
ગેરરીતિ ખાળવા કોઈ કચાશ નથી રાખીઃ કુલપતિ
યુવક કોંગ્રેસના આક્ષેપો અંગે કુલપતિ ડો. પ્રતાપસિંહ ચૌહાણનો સંપર્ક સાધતા તેમણે જણાવ્યું હતું કે, ગેરરીતિ ખાળવા માટે અત્યારે જે પ્રયાસો થયા છે તે ક્યારે પણ નથી થયાં. હાઈટેક પ્રણાલીથી મોનીટરીંગ થાય છે અને મે ંબધાને ઓપન ઓફર કરેલી છે કે, પરીક્ષા ગેરરીતિ બાબતે મને કોઈ સીધી જ ફરિયાદ કરી શકશે. ફોન કે ઓન લાઈન પણ વિગતો મળશે તો ચોક્કસ પગલાં લેવાશે. વહિવટી ક્ષેત્રે જે પારદર્શક વહિવટ ચાલે છે તે સૌ જાણે છે.



CMની સુરક્ષા માટે શહેરમાં થશે કિલ્લેબંધી
Posted on Wednesday June 21, 2017

  • ૭,૦૦૦થી વધુનો પોલીસ કાફલો ત્રણ દિવસ સુધી રહેશે તહેનાત, દિલ્હીની સુરક્ષા ટીમ અલગ આવશે
    રાજકોટ : વડાપ્રધાન તા.૨૯ના રોજ રાજકોટ આવી રહ્યા હોય ઝેડ પ્લસ અને એસપીજી સુરક્ષાને લઈને વડાપ્રધાનની સલામતિ માટે રાજકોટની કિલ્લેકબંધી થશે. વડાપ્રધાનના આગમનના ત્રણ દિવસ પહેલાં આઈજીથી પી.એસ.આઈ સુધીના સહિત પીએસઆઈથી લઈ ૬૭૦થી વધુ અધિકારીઓ મળી ૭,૦૦૦થી વધુ પોલીસ કર્મચારીઓ ઉપરાંત દિલ્હીથી આવનારી ખાસ ફોર્સ મળી અંદાજે ૭,૫૦૦ હજારથી વધુ સુરક્ષા કર્મીઓ વડાપ્રધાનની સલામતિ માટે ખડેપગે રહેશે.
    વડાપ્રધાન તા.૨૯ના બપોર ચાર વાગ્યા બાદ રાજકોટ આવી પહોંચશે. રાજકોટમાં રેસકોર્સ, આજીડેમ ઉપરાંત આઠ કિલોમીટરનો રોડ શો હોવાથી સુરક્ષા વ્યવસ્થા પણ એટલી જ સંગીન બનાવવામાં આવી છે. બે સ્થળે જાહેર સભા ઉપરાંત રોડ શો દરમિયાન રૃટ પર પોલીસ, એસઆરપી, કેન્દ્રીય સુરક્ષા એજન્સીઓના હથિયારધારી કર્મચારીઓ જ દેખાશેે. ગુજરાતભરમાંથી પોલીસદળ ઉપરાંત એસઆરપી રાજકોટમાં ઉતરશે. પી.એમ.ની સિક્યુરીટી પ્રોટોકોલને લઈને મહત્તમ પણે પાંચ દિવસ સુધી બંદોબસ્ત રહેતો હોય છે. જે દ્રષ્ટીએ તો તા.૨૫ના રોજ સમગ્ર પોલીસ રાજકોટમાં ઉતરી પડેત.
    જો કે તા.૨૫ના અષાઢી બીજ રથયાત્રા અને બીજા દિવસે રમઝાન ઈદ હોવાના કારણે એ બંદોબસ્ત પુરો થયા બાદ બીજા દિવસે તા.૨૭ના જુદા જુદા શહેર, જીલ્લાની પોલીસ રાજકોટમાં પહોંચશે. સ્ટાફ આવી પહોંચ્યા બાદ બંદોબસ્તનું રિહર્સલ રહેશે. પી.એમ.ના સભા સ્થળથી લઈ રૃટ, રોડ શો સહીતના સ્થળે ખાસ તાલિમબધ્ધ એસપીજી અધિકારીઓ, કમાન્ડો જ કબજો લઈ લશે. પી.એમ.ની સુરક્ષા માટે આવનારા અધિકારીઓથી લઈ સુરક્ષા કર્મીઓની રહેવા, જમવા સહિતની સુવિધા માટે શહેર પોલીસ તંત્ર ઉંધે માથે થયું છે. શહેરમાં મેરેજ હોલ, આવી જગ્યાઓ ઉપરાંત હોટલોના પોલીસ દ્વારા બુકીંગ થઈ રહ્યા છે.
    ચોક્કસ અંતરે ઉભા કરાશે સુરક્ષા ટાવર
    વડાપ્રધાન રેસકોર્સ સંબોધશે રેસકોર્સ સભા સ્થળ નજીક ચોક્કસ હાઈટ પર સુરક્ષા ટાવર ઉભા કરાશે. ત્યાંથી તેઓ આજીડેમ જનારા હોવાથી જે રૃટ પર તેમજ આજીડેમથી રોડ- શો યોજી એરપોર્ટ પર પહોંચશે. આઠ કિ.મી.ના એ રૃટ પર પણ થોડા થોડા અંતરે ટાવરો ઉભા કરાયા છે. જે ટાવર પરથી બાયનોક્યુલર મારફતે સુરક્ષા કર્મીઓ નજર રાખશે. પી.એમ. એરપોર્ટથી ઉતરે કે પરત એરપોર્ટ પર ફરે ત્યાં સુધીની એક એક પળની વિડીયોગ્રાફી માટે પણ વ્યવસ્થા ઉભી કરાઈ છે.
    શહેર પોલીસે ત્રણ રૃટ ચકાસ્યા
    એરપોર્ટથી રેસકોર્સ સભા સ્થળ અને ત્યાંથી આજીડેમ પહોંચનારા પી.એમ. માટે રાજકોટ શહેર પોલીસે સંભાવના વાળા ત્રણ રૃટ પર ચકાસણી કરી હતી. જેમાં રેસકોર્સથી મહિલા કોલેજ અંડરબ્રીજ, કાલાવાડ રોડ, કે.કે.વી.થી રીંગ રોડ, ગોંડલ રોડ સર્કલથી થઈ આજીડેમ સ્થળ પર, આ ઉપરાંત રેસકોર્સથી શહેરમાં થઈને ૮૦ ફુટ રોડના માર્ગે આજીડેમ સહિતના ત્રણ રસ્તાઓ પર સિક્યુરીટી અને શું મુશ્કેલીઓ અત્યારથી શહેર પોલીસ દ્વારા ચકાસવા રૃટ પર વાહનો લઈને ચકાસણી કરાઈ રહી છે.



18300લાભાર્થીની થઈ નોંધણી, ડૉમમાં કલરકોડ પ્રમાણે બેસાડાશે
Posted on Tuesday June 20, 2017

રાજકોટ: દિવ્યાંગ સહાય મેળામાં ૧૮૩૦૦ લાભાર્થીઓની નોંધણી સ્ાાથે તંત્રએ તેમની વ્યવસ્થા માટે ધ્યાન કેન્દ્રીત કર્યું છે. દરેક તાલુકામાંથી આવતા દિવ્યાંગો માટે તેમની કલર કોડીંગ સાથે બેઠક વ્યવસ્થા ગોઠવાશે. આ માટે તેમને ખાસ રંગના પાસ આપવામાં આવનાર છે. આ દિવ્યાંગોને ૧૨.૩૩ કરોડના સાધનોનું વિતરણ કરવામાં આવનાર છે.
અધિક કલેકટર હર્ષદભાઈ વોરાના જણાવ્યા પ્રમાણે ત્રણે કાર્યક્રમની તૈયારીઓ એક સાથે ચાલી રહી છે અને તેમાં લાભાર્થીઓને ઝડપથી સહાય કિટ વિતરણ પુરૃ કર્યા બાદ જે સામગ્રી તે સાથે લઈ ન જઈ શકે તેમ હોય તેને ટ્રક દ્વારા તેમના ઘરે પહોંચાડવામાં આવનાર છે. ટ્રાઈસિકલ, સ્કુટર, હાથલારી જેવા સાધનો જે તે લાભાર્થીના ઘર સુધી પહોંચતા કરવામાં આવશે. આ માટે ૮૦ ટ્રકની વ્યવસ્થા રાખવામાં આવી છે. વડાપ્રધાનના રોડ શો દરમિયાન ૧૦ સ્થલે સેલ્ફીઝોનમાં અલગ અલગ થીમ સાથે સેલ્ફી લઈ શકાશે. સોરઠીયાવાડી અને અન્ય એક સ્થળે થ્રી ડી શો પણ યોજવામાં આવનાર છે. મુખ્યમાર્ગ ઉપરના તમામ સર્કલોને શણગારીને તેમાં સરકારી યોજનાઓનો પ્રચાર કરવામાં આવનાર છે.



Back to top